Centurion, met sy verfrissende klimaat, is een van die snelgroeiendste stadsgebiede in die land en die goeitempo sal na alle waarskynlikheid gehandhaaf word. Die stad het ontwikkel vanuit ‘n "slaapdorp"  vir Pretoria en Johannesburg tot ‘n gesogte woongebied met uitstekende infrastruktuur, groeiende nywerheidsgebiede en ‘n mensvriendelike stadskern rondom ‘n mensgemaakte meer. Die gebied kombineer die geriewe van 'n stad met die atmosfeer van die platteland.

Dit is sentraal geleë in Gauteng, die nywerheids-, besigheids- en administratiewe hartland van Suid-Afrika. Verbinding met ander sentra rondom Centurion geskied met die hulp van twee snelweë, die Ben Schoeman- en Danie Joubert-hoofweë, asook die hoofweg tussen Pretoria, Kemptonpark en die Johannesburg Internasionale Lughawe. Alternatiewe verbindingsroetes met Pretoria, Johannesburg en die Oos- en Wesrand is ook beskikbaar.

Die metamorfose van Centurion het begin met die ontwikkeling van 'n stadkern rondom 'n mensgemaakte meer. Die eerste fase (Centurion Boulevard) is in 1985 geopen. Dit bestaan uit winkels, kommersiële, kantoor-, ontspanning- en behuisingontwikkelings.

Die totale winkeloppervlakte het 103 000 vierkante meter, waarvan 62 500 vk meter kleinhandelruimte, beslaan en is sedertdien geweldig uitgebrei. Die waterorrel in die meer is uniek in die omgewing en lok besoekers en inwoners wat ontspan tydens of na inkopies of besoeke aan die rolprentteaters en restourante in die sentrum. Die amfiteater by die meer word gereeld gebruik vir musiekkonserte en ander feeste.

Centurion huisves verskeie ander nywerheidsparke en nywerheidsdorpe vir ligte nywerhede, asook kantoorontwikkelings en -parke. Momentum se hoofkantoor is onlangs voltooi en Samrand is een van die uistekende ontwikkelings wat vanaf die Ben Schoeman-hoofweg sigbaar is.